Turli shirinliklar, sous va qishga hozirlangan korserva va tuzlamalarda sirka qo‘llanadi. Do‘konlarda turli xildagi sirkalarni uchratish mumkin. Uy bekalari asosan sintetik sirka turini ishlatishadi. Shu bilan birga bu mahsulotning turli turlari bor va ularni taomlarda ishlatilish o‘rinlari ham xilma‑xil.
Sirkani qo‘llash Payg‘ambarimiz sallallohu alayhi vasallamning sunnatlariga kiradi. Payg‘ambarimiz sallallohu alayhi vassalam sirkani «ajoyib ziravor», degan ekanlar.
Mundarija
Tabiiy sirka turlari
Olma sirkasi – sharbat yoki vinodan tayyorlanadi. Och jigarrang bu turli salat, ragu va dimlamalarda ishlatish tavsiya qilinadi. U taom mazasiga o‘zgacha ta’m qo‘shadi.
Uzum sirkasi – qo‘llanilgan uzum naviga ko‘ra qizil yoki oq bo‘ladi. Oq uzum sirkasi – baliq va tovuq go‘shtidan tayyorlangan taomlarda ishlatiladi. Qizil turi esa – go‘shtli taomlarga va marinadlarga xo‘shta’mlik beradi.
Guruch sirkasi. Tozalangan va tozalanmagan guruchda hozirlanadi. Tozalangan guruchdan hozirlanganini oq sirka, tozalanmagan guruchdan tayyorlangani esa qora sirka deb nomlashadi. Guruch sirkasi boshqa turlarga qaraganda yumshoq. Salat souslari va yengil marinadlarda ishlatiladi.
Balzamli sirka – dunyodagi eng qimmatbaho hisoblanadi. Oq uzumdan tayyorlanadi. O‘ziga xos tayyorlanish uslubi va uzoq vaqt davomida sirka quyuqlashadi va to‘q rangga kiradi.
Hozirlanish texnikasi murakkab bo‘lganligi bois, qimmatbaho hisoblanadi. Do‘kon rastalarida balzam sirkasining o‘xshashlarini topish mumkin. Balzam sirkasi har qanday taomga va hatto mevalarga ham xo‘shta’mlik qo‘shadi.
O’qing: Shamollashni uy sharoitida davolash
Sintetik sirka
Essensiya ko‘rinishida, o‘tkirligi 70‑80 foizni yoki aralashtirilgan 9 foizlik holda bo‘ladi. Sintetik sirka asosan qishki korservalar va tuzlamalar uchun qo‘llaniladi. Sintetik sirkani turli taomlarda ishlatish mumkin, ammo sirkaning tabiiy turlari salomatlik uchun foydaliroq.
Sirkani qanday tanlash kerak?
Yorlig‘ini o‘qing. Tabiiy sirkaning o‘tkirlik darajasi 6 foizdan oshiq bo‘lmasligi kerak. Tarkibida essensiya, konservant va bo‘yovchi moddalar bo‘lgan sirka tabiiy emas.
Ko‘rinishi: Sirkaning tagida biroz qo‘yqa bo‘lishi mumkin, rangi esa juda to‘q ham, juda och ham bo‘lmasligi lozim.
Qanday idishda saqlanadi?
Sirkalarni xarid qilganda albatta shisha idishdagi sirkani tanlang. Chunki plastik idishlarda turli kimyoviy reaksiyalar hosil bo‘lishi oqibatida sirkaning tarkibida salomatlikka zararli bo‘lgan moddalar yig‘ilishi mumkin.
Saqlash: Tabiiy sirkani qorong‘u va sovuq joyda saqlash zarur. Shunda sirkaning hid va ta’miga zarar yetmaydi.
Uy sharoitida sirka tayyorlash
Sirkani uy sharoitida ham hozirlash mumkin. Tayyorlash sirlarini o‘rganib olsangiz, hech bir sirkalar o‘z qo‘llaringiz bilan hozirlagan sirkaning o‘rnini bosa olmaydi. Hamda ichiga solingan mahsulotlardan ko‘nglingiz xotirjam bo‘ladi.
Olma sirkasi
1 kg olmani urug‘idan tozalang, po‘stlog‘iga tegmang va olmalarni katta‑katta to‘g‘rang. Olmalarni ichi chuqur idishga soling va yarim stakandan kamroq shakar soling. Sirkaning tezroq tayyor bo‘lishi uchun 10 gr achitqi (bozor drojjesi) solishingiz mumkin. Olmalar ustida 1,5‑2 litr qaynatilgan iliq suv soling va idish ustini yopib qorong‘u va iliq joyga qo‘ying. 10 kundan so‘ngra esa olmalarni suvdan suzib oling. Ustini doka bilan yopib, yana 2 haftaga qoldiring. Tayyor bo‘lgan sirka och rangga kiradi. Shisha idishlarga solib, qopqog‘i yopiq holda saqlang.
Ushbu maqolani ham o’qing: Qon ko’paytirish uchun tabiiy mahsulotlar va BFQ
Manba: Xasta.uz
