Tish chirishi, tish kariyesi – tish qattiq toʻqimalarining zararlanishi; tish amali (dentin)ning asta-sekin yemirilib, kovak hosil boʻlishi. Bolalarda koʻp uchraydi. Koʻpincha, bolalarning birinchi katta jagʻ tishlari (oltinchi tish) chiriydi.
Tish chirishi ovqatlanish tarzning buzilishi; xamir ovqat va shirinliklarga ruju qilish; ovqat tarkibida kaliy, fosfor va vitaminlar yetishmasligi, shuningdek, ovqatda hoʻl meva va sabzavotlar boʻlmasligi hamda tishlarni notoʻgʻri parvarish qilish oqibatida paydo boʻlishi mumkin. Bolalar tishining chirishiga homilador ayollarning ovqatlanish tartibi, bolani notoʻgʻri ovqatlantirish va boshqa(lar) maʼlum darajada taʼsir etadi. Ichimlik suv tarkibida ftor kam boʻlgan joylarda bu kasallik koʻp uchraydi (asosan, bolalarda).
Ogʻir infeksion kasallik bilan ogʻrigan bolalarda, ayniqsa, ularning balogʻatga yetish davrida (xususan, qizlarda) tish chirishi tez avj olib ketadi. Tishning chirishi, koʻpincha, homiladorlikda ham kuzatiladi, chunki bu davrda homila skeleti shakllanishi uchun zarur boʻlgan kalsiyga talab oshishi natijasida ona organizmida ichki sekretsiya bezlari faoliyati va moddalar almashinuvining buzilishi kabi fiziologik oʻzgarishlar roʻy beradi.
Tish chirishi sezilarsiz boshlanadi. Dastlab tish emali xiralashib, gʻadir-budurlashadi, oqish yoki sargʻimtir dogʻ paydo boʻladi (q. Tish), keyinchalik bu joy yumshab qoladi, bu – yuza tish chirishi deyiladi; bunda tish choʻtka bilan tozalanganda, shirin, nordon narsalar yeyilganda ogʻriydi. Chirigan tish kovagi asta-sekin chukurlashib, emaldan dentinga oʻtadi, ana shunda oʻrta tish chirishi kelib chiqadi, oʻtkir kechganda mexanik, kimyoviy yoki issik-sovuk taʼsirida biroz ogʻriq paydo boʻladi.
Tishning chirish jarayoni dentin toʻqimasining ichiga oʻtishi natijasida pulpa ustida yumshab yupqalashgan dentin qoladi; bunda chirigan tish kovagiga ovqat kirishi (issiq, sovuq suv va boshqa(lar) taʼsir etishi) bilan kuchli ogʻriq paydo boʻlib, taʼsirot yoʻqolganda darrov toʻxtaydi; bu – chuqur tishning chirishi deb ataladi.
Agar oʻz vaqtida davo qilinmasa, mikrob tishning yumshoq toʻqimasi (pulpa)ga kirib, uni yalligʻlantiradi – pulpit vujudga keladi; bora-bora tish ildizi atrofidagi toʻqimalar ham yalligʻlanishi mumkin, tish chirishini stomatolog shifokor davolaydi. Tish kovagini tozalab plombalanadi.
Oldini olish uchun organizm ehtiyojiga zarur mineral tuzlar (ayniqsa, kalsiy, fosfor), vitaminlar, yogʻlar, karbonsuvlar va h. k. ga boy ovqatlar yeb turish, ovqatlanish tartibiga rioya qilish, ogʻiz boʻshligʻini sogʻlom saqlash kerak.